“सिध्रेण” या लघुकाय ग्रंथाविषयी ग्रंथकर्ते प.पू.परमात्मराज महाराज यांचे मनोगत –
कोरोना महासंकटाच्या प्रसंगाने जे ५१ लेख लिहिले त्या लेखांचा आध्यात्मिकदृष्ट्या विस्तार करून पुस्तकरूपात प्रकाशित करण्याचे ठरविले होते. ते पुस्तक बुधवार दि. २४ जून २०२० ला प्रकाशित होऊन भाविकांच्या हाती आले.
कोरोना महामारीसारख्या अत्यंत भयानक प्रसंगी लोकांमध्ये सावधानता बाळगायला लावणारे विचार आवश्यक असतात. लोकांची मनःस्थिती बिघडणार नाही अशा पद्धतीचे विचार तसेच बिघडलेली मनःस्थिती पुन्हा ताळ्यावर आणणारे विचार लोकांमध्ये पसरणे आवश्यक असते.जनतेमध्ये जीवनाविषयीचा सकारात्मक दृष्टिकोण टिकून राहणे गरजेचे आहे. या सगळ्या मुद्यांचा विचार करून पुष्कळशे भाविक स्वतःजवळ निश्चितपणे हे पुस्तक ठेवतील, असा पूर्ण विश्वास आहे.
चिकित्सापद्धतीच्या अनुषंगाने या पुस्तकात पक्षपातविरहित वर्णन असल्यामुळे ॲलोपॅथी, आयुर्वेद, होमियोपॅथी इत्यादींशी संबंधित डॉक्टरांनाही आवडेल असेच हे पुस्तक आहे. विज्ञानाच्या विविध शाखा तसेच इतरही अनेकानेक विषयांशी संबंधित तज्ज्ञांनाही हे पुस्तक निश्चितपणे आवडेल, असा अतीव विश्वास आहे.
कोणत्याही संकट काळात व इतरही काळामध्ये मानसिक बळ वाढविणारे हे पुस्तक सर्वांनी आपल्या घरी ठेवावे व घरातील सर्वांनी वाचावे.
या पुस्तकात आध्यात्मिक विचारही असल्यामुळे या पुस्तकाकडे श्रद्धावान् लोक ‘एक लघुकाय पवित्र ग्रंथ’म्हणजे छोट्या आकाराचा एक पवित्र ग्रंथ’ – अशा स्वरूपातच बघतील. आकार लहान असो, मोठा असो, त्यासंबंधाने सद्भाविकांमध्ये श्रद्धायुक्त अशी धार्मिक भावना निर्माण होत असते व ती टिकूनही राहत असते.

सर्वांनी सिध्रेणची वैशिष्ट्ये समजून घ्यावीत.
हे पुस्तक हातात आल्यावर व याची प्रस्तावना ( भूमिका ) वाचल्यावर भाविकांना सिध्रेण या नांवाचे विविध अर्थ कळून येतील. अतिशय उपयुक्त श्रद्धेच्या अतिशय रमणीय बागेत विहार करू इच्छिणाऱ्या भाविकांना ‘सिध्रेण’या नांवाचे हे सगळे अर्थ आनंद देतील.
कोरोना महासंकटामुळे जनता अत्यंत तणावग्रस्त अवस्था अनुभवली आहे. कुठल्याही कालखण्डात जनतेच्या मनावरील अनावश्यक तणाव दूर करण्यासाठी सिध्रेणमधील विचार निश्चितपणे साहाय्यक होतील.
या पुस्तकात कोरोना संबंधाने जनतेला अतिशय आवश्यक वाटेल एवढी माहिती आहे, याची यथार्थ जाणीव पुस्तक वाचल्यावर सर्वांना होईलच.